rêveur tounsi

تعلّم تعوم في بلاد غارقة في دمّ ولادها، جابَتهم وتشيّطهم لكلبها. تعلّم تعوم في زبلتها، في وسخها، وفي وديانها، تعلّم تعوم فيها، وتعلّم تغرق، وتعلّم كيفاش تموت، وتعلّم كيفاش تسكت. تعلّم كيفاش يجري دمّك في شوارعها وكساها، تعلّم كيفاش تغنّي في حبوستها، تعلّم كيفاش تبول على حكومتها، تعلّم كيفاش تحبّها، وتعلّم كيفاش تنساها.

أمل قوم أمل قوم قوم نعملوا بلعة أمل يا متاع الأجيال قوم   أمل قوم أمل قوم شنقولك نحرقوا للطليان؟ وبرا متنا نموت مع الأمل أمل ستيكتي وفات، فما شراب أحمر أمل قُلّي شبيه الوطن؟ كي البوردال، ما يحكموه كان الهمال أمل أمل قوم راني غرقت وما نعرش نعوم

رجعنا لأيام اللي فيها قاضي التحقيق النزيه يتبدّل من الجلسة الأولى. ورجعنا لأحكام معوّجة على دوسي فارغ، هذا قضاء… ورجعناه لسطل. رجعنا لأيام اللي فيها البوليس كان كلب مسيّب، يعفس على القانون ويبول على كاتِبُه. رجعنا لمواطن باع كرامتو على خاطر خبز صغارو، وفي الآخر يبات جيعان. رجعنا لأيام الكلمة فيها تتحاسَب. زعمة رجعنا… ولا فِقنا من حِلمة العتارس؟ قلنا ربيع، وصباحنا على شتاء قارس.