rêveur tounsi

كيف كنّا مراهقين انبهرنا بالحلم الأحمر، انبهرنا بصورة الرفيق جيفارا، انبهرنا بفكرة الثورة الحمراء، وزِدنا اتخمّرنا مع الفلسفة الماركسية، بالزعيم لينين، بالراية الحمراء… كنّا نعشقوا… كنّا نرقصوا على موسيقى الجيش الأحمر وأغاني الحزب الشيوعي الإيطالي، كنّا نحلموا حلم يقظة، كنّا نحسّوا رواحنا كي سبارتكوس، حاملين وحدنا قضية العالم، قضية العبيد، قضية الطبقة المضطهدة. مشينا، جرينا للحزب، الحزب اللي نظّر له الرفيق لينين، حزب البروليتاريا، حزب من أجل توحيد الصفوف المناصرة للقضية… إيجي يا زمان، امشي يا زمان، عملنا ثورة — أو ما يُسمّى بثورة الخبز والحرية، أو انتفاضة، أو انقلاب ناعم، والتسمية اللي تحب — أما نحنا حسّينا رواحنا ثوّار، حسّينا رواحنا رفاق جيفارا أيام الغِرِيلا في الثورة الكوبية. قصبة 1، قصبة 2، “إصلاح المسار واجب”، زدنا ضربنا الصباط، زدنا اتخمّرنا، رفعنا شعار “السلطة للشعب”، وطلبنا بإسقاط النظام، طلبنا مجلس تأسيسي. إيه… ما أحلى هاك النهار، حسّينا ولو مرّة في حياتنا البائسة بنكهة الانتصار، انتصار رفاق جيفارا وأبناء لينين. حتى من أبناء سيّد قطب شا...

بوداباست بلاد الي معندوا بلاد  متغرّب في بلادي، متغرّب في بلاد أهلي وأجدادي… هزّيت حوايجي ووهجت، شقّيت بحور وبرور، عدّيت أيّاماتي من مدينة لمدينة، سايح، ضايع، جاي يزور… جاي يلوّج على بلادو، بلادي اللي صورتها في خيالي، بلادي كيما حبيتها… بحكم القدر لقيتها، ومن بئس زهري طلعت ما نفهمش لغتها، ورغم ذلك رميت لها روحي، رميت روحي في ودّها، في سماها، بين زنايقها وفي قصورها. ورغم جرحها حضنتني، حبّتني وضحكتلي، وعلى ذكرياتها الحزينة حكّتلي… حكّتلي على خمسين سنة استعمار روسي، حكّتلي على ولادها اللي ضاعوا في الغولاغ، حكّتلي على ستالين اللي غزّاها بدبّاباته وشعل فيها النار، حكّتلي على هتلر اللي دمّرها بين ليل ونهار، حكّتلي على الصابون اللي تعمل من جلد ولدها… ويامّا حكّت… بودابست، المدينة المجروحة، بودابست المدينة اللي بدموعها حفرت وديان، بودابست، بلاد اللي ما عندو بلاد… جنّة فوق الأرض. يكذب اللي قال فينا ما زينا، ويكذب اللي سمّى باريس عاصمة الأنوار، ويكذب اللي قال موسكو بلاد الفودكا والبرد، ويكذب اللي قال برلين بلاد الحفلات والسهريات. إي نعم، يا إمّا ك...